नवरात्रीची आरती

आश्विन शुध्दपक्षीं अंबा बैसली सिंहासनी हो | प्रतिपदेपासून घटस्थापना टी करुनी हो ||
मूलमंत्रजप करुनी भोंवते रक्षक ठेवुनी हो | ब्रह्मा विष्णू रुद्र आईचे पूजन करिती हो ||१||
उदो बोल उदो अंबाबाई माउलीचा हो | उदोकारे गर्जती काय महिमा वर्णू तिचा हो || धृ ० ||
द्वितीयेचे दिवशी मिळती चौसष्ट योगिनी हो | सकळांमध्ये श्रेष्ठ परशुरामाची जननी हो |
कस्तुरी मळवट भांगी शेंदूर भरुनी हो | उदोकारे गर्जती सकल चामुंडा मिळूनी हो || उदो ….||२||
तृतीयेचे दिवशी अंबे श्रुंगार मांडला हो | मळवट पातळ चोळी कंठी हार मुक्ताफळा हो ||
कंठींची पदकें कांसे पितांबर पिवळा हो | अष्टभुजा भिरविती अंबे सुंदर दिसे लीला हो | उदो…. ||३ ||
चतुर्थीच्या दिवशी विश्वव्यापक जननी हो | उपासकां पाहसी प्रसन्न अंत:करणी हो ||
पूर्णकृपें जगतमाते मनमोहिनी हो | भक्तांच्या माउली सूर ते येती लोटांगणी हो || उदो … ||४||
पंचमीचे दिवशी व्रत ते उपांगललिता हो | अर्ध्यपाध्यपूजनें तुजला भवानी स्तविती हो ||
रात्रीचे समयी करिती जागरण हरिकथा हो | आनंदें प्रेम तें आले सद्भावे क्रीडता हो || उदो …||५||
षष्ठीचे दिवशी भक्तां आनंद वर्तला हो |घेउनी दिवट्या हस्ती हर्षे गोंधळ घातला हो ||
कवडी एक अर्पिता देशी हार मुक्ताफळा हो | जोगवा मांगता प्रसन्न झाली भक्तकुळा हो || उदो …|| ६||
सप्तमीचे दिवशी सप्तश्रुंगगडावरी हो | तेंथे तूं नांदसी भोंवती पुष्पें नानापरी हो ||
जाईजुईसेवंती पूजा रेखियली वरवी हो | भक्त संकटीं पडतां झेलुनी घेसी वरचेवरी हो || उदो … ||७||
अष्टमीचे दिवशी अष्टभुजा नारायणी हो | सह्याद्रीपर्वतीं पाहिली उभी जगज्जननी हो ||
मन माझें मोहिलें शरण आलो तुजलागुनी हो | स्तनपान देऊनी सुखी केलें :करणी हो || उदो … ||८ ||
नवमीचे दिवशीं नव दिवसांचे पारण हो | सप्तशती जप होमंहवनें सद्भक्ती करुनी हो ||
षड्सअन्ने नैवेद्यासी अर्पियली भोजनीं हो | आचार्य ब्राह्मणां तृप्त केलें त्वां कृपेकरुनी हो || उदो … ||९ ||
दशमीच्या दिवशी अंबा निघे सीमोल्लंघनी हो | सिंहारूढ दारूण शस्त्रें अंबे त्यां घेउनी हो ||
शुंभनिशुंभादिक राक्षसां किती मारसी रणीं हो | विप्रा रामदासां आश्रय दिधला तों चरणीं हो || उदो …||१० ||